অৱশেষত অন্ত পৰিল জল্পনা-কল্পনাৰ! আজি গঠন হ'ব নগাঁও জিলাৰ ৰহা আৰু কামপুৰ পৌৰসভা, ৰহাত পৌৰপতি বিজেপিৰ, কামপুৰত অগপৰ

 প্ৰায় এমাহজোৰা প্ৰতীক্ষাৰ অন্তত আজি গঠন হ'ব নগাঁও জিলাৰ ৰহা পৌৰসভা আৰু কামপুৰ পৌৰসভা। ইতিমধ্যে ৰহা আৰু কামপুৰ পৌৰসভাৰ পৌৰপতি আৰু উপপৌৰপতি নিৰ্বাচিত কৰা হয় ৷

নগাঁও জিলা বিজেপি আৰু ৰাজ্যিক বিজেপিৰ সিদ্ধান্ত অনুসৰি ৰহা পৌৰসভাৰ পৌৰপতি হিচাপে বন্তি দাস আৰু উপ পৌৰপতি হিচাপে অনিমা দাসক নিৰ্বাচন কৰা হয় ৷ উল্লেখ্য যে, সদ্যসমাপ্ত পৌৰসভা নিৰ্বাচনত ১০টা ৱাৰ্ডৰে গঠিত ৰহা পৌৰসভাত বিজেপি আৰু অগপৰ  মিত্রজোঁটে ৮ টা ৱাৰ্ড দখল কৰে  ৷

আনহাতে বিজেপিৰ দলীয় সিদ্ধান্ত অনুসৰি ২ নং ৱাৰ্ডত বিজয় সাব্যস্ত কৰা বিজেপি দলৰ বন্তি দাসক পৌৰপতি আৰু ৮ নং মহলাত বিজয় সাব্যস্ত কৰা বিজেপি দলৰ অনিমা দাসক উপ পৌৰপতি নিৰ্বাচিত কৰা হয় ৷

আজি ৰহা পৌৰসভাৰ পৌৰপতি, উপপৌৰপতিৰ লগতে  ৱাৰ্ড আয়ুক্ত সকলৰ শপত গ্ৰহণ আৰু পৌৰসভা গঠন হ'ব ৷ ইপিনে কামপুৰ পৌৰসভা নিৰ্বাচনত ১০টা মহলাৰ  সাতটাত বিজেপি আৰু তিনিটাত অগপ দলৰ প্ৰাৰ্থী জয়ী হৈছিল। কামপুৰ পৌৰসভাৰ পৌৰপতি হিচাপে নিৰ্বাচিত কৰা হৈছে ৭নং ৱাৰ্ডত অগপ দলৰ পৰা নিৰ্বাচিত হোৱা ধৰিত্ৰী বৰুৱাক।আনহাতে উপপৌৰপতি হিচাপে নিৰ্বাচিত কৰা হৈছে ৫নং ৱাৰ্ডত বিজেপি দলৰ পৰা নিৰ্বাচিত হোৱা জয়ন্ত ফুকনক। ইফালে আজি কামপুৰ পৌৰসভাও গঠন কৰা হ'ব।