এখন চৰকাৰী বিদ্যালয়ত নামভৰ্তিৰ প্ৰ-পত্ৰ সংগ্ৰহৰ বাবে হেতা–ওপৰা, নিশা পদপথতে আঁঠুৱা টানি প্ৰ–পত্ৰৰ বাবে অপেক্ষা অভিভাৱকৰ

 

১৮৮২ চনত স্থাপিত ঐতিহ্যমণ্ডিত বিদ্যালয়খনৰ প্ৰথম শ্ৰেণীত আছে ৬০খন আসন। কিন্তু শ শ অভিভাৱকে নিজৰ সন্তানক বিদ্যালয়খনত নামভৰ্তি কৰাই দিবলৈ আশা পুহি ৰাখিছে।

ৰাজ্যত যি সময়ত ছাত্ৰ–ছাত্ৰীৰ অভাৱত বহু চৰকাৰী বিদ্যালয় বন্ধ হৈছে, সেই সময়তে শিৱসাগৰ চহৰৰ এখন চৰকাৰী প্ৰাথমিক বিদ্যালয়ত দেখিবলৈ পোৱা গৈছে ব্যতিক্ৰমী দৃশ্য।

শিৱসাগৰৰ ১নং টাউন প্ৰাথমিক বিদ্যালয়ত ছাত্ৰ–ছাত্ৰীৰ নামভৰ্তিৰ বাবে আবেদন পত্ৰ সংগ্ৰহ কৰিবলৈ দুদিন দিন–ৰাতি একাকাৰ কৰি প্ৰৱেশদ্বাৰৰ সন্মুখত অপেক্ষা কৰিলে অভিভাৱকসকলে।

২১ মাৰ্চৰ পুৱা ১০ বজাত বিদ্যালয়খনত দিব ছাত্ৰ–ছাত্ৰীৰ নামভৰ্তিৰ প্ৰ-পত্ৰ। কিন্তু ছাত্ৰ–ছাত্ৰীৰ অভিভাৱক সকলে দুদিন ধৰি নাখাই-নবৈ বিদ্যালয়ৰ সন্মুখত অপেক্ষা কৰি ৰ'ল প্ৰ-পত্ৰ সংগ্ৰহৰ বাবে।

১৮৮২ চনত স্থাপিত ঐতিহ্যমণ্ডিত বিদ্যালয়খনৰ প্ৰথম শ্ৰেণীত আছে ৬০খন আসন। কিন্তু শ শ অভিভাৱকে নিজৰ সন্তানক বিদ্যালয়খনত নামভৰ্তি কৰাই দিবলৈ আশা পুহি ৰাখিছে। ফলত দিন -ৰাতি একাকাৰ কৰি প্ৰ-পত্ৰ সংগ্ৰহ কৰিবলৈ অপেক্ষা কৰি থকা দেখা গ'ল বিদ্যালয় খনৰ সন্মুখৰ পদপথত।

আনকি নিশাও বহু অভিভাৱকে স্কুলখনৰ সন্মুখৰ পদপথৰ ওপৰতে ম'হৰ কামোৰ খাই, আঁঠুৱা তৰি ক্ষণ গণি গণি প্ৰ-পত্ৰ সংগ্ৰহৰ মানেসেৰে সময় পাৰ কৰে।‌ কোনেৱে পদপথতে আঁঠুৱা তৰি, কোনোৱে ধূপ জ্বলাই ম'হ খেদাই, আন কোনোৱে আকৌ গাড়ী, ৰিক্সাতে শুই ৰাতিটো পাৰ কৰিলে। লক্ষ্য এটাই, যেনেতেনে সন্তানৰ নাম ভৰ্তিৰ বাবে বিদ্যালয়খনৰ পৰা প্ৰ-পত্ৰ সংগ্ৰহ কৰা।