কেনেকৈ নিৰাপত্তা প্ৰদান কৰা হয় দেশৰ প্ৰধানমন্ত্ৰীক?

 

পাঞ্জাৱ ভ্ৰমণ কালত প্ৰায় ২০ মিনিট প্ৰধানমন্ত্ৰী নৰেন্দ্র মোদীৰ কনভয় অৱৰোধ কৰাৰ পিছত এতিয়া সৰ্বত্ৰ চৰ্চাৰ বিষয় হৈ পৰিছে প্ৰধানমন্ত্ৰীৰ নিৰাপত্তাৰ দিশটো । ৰাজনৈতিক মহলত ঘটনাটোক লৈ অভিযোগ আৰু প্ৰতি-অভিযোগৰ ধাৰাবাহিকতা বাহাল থকাৰ সময়তে চৰ্চাৰ তুংগত উঠিছে কোনে কেনেকৈ প্ৰধানমন্ত্ৰীক সুৰক্ষা প্ৰদান কৰে ।

১৯৮৪ চনত তদানীন্তন প্ৰধানমন্ত্ৰী ইন্দিৰা গান্ধীক দিল্লী আৰক্ষীৰ পৰা নিয়োজিত দেহৰক্ষীয়ে গুলিয়াই হত্যা কৰাৰ পিছত দেশৰ প্ৰধানমন্ত্ৰীক নিৰাপত্তা প্রদানৰ কাৰণে এক স্বতন্ত্ৰ গোট গঠন কৰাৰ চিন্তা চৰ্চা চলিল । ১৯৮৫ চনত গৃহ মন্ত্ৰণালয়ে গঠন কৰি দিয়া বিৰবল নাথ কমিটীয়ে অনুৰূপ পৰামৰ্শ আগবঢ়ালে ।

পৰামৰ্শ মৰ্মে দেশৰ ৰাষ্ট্ৰপতিৰ নিৰ্দেশত ১৯৮৫ চনৰ ৩০ মাৰ্চত গঠন হয় Special Protection Group (SPG) । তিনি বছৰ পিছত ১৯৮৮ ৰাজীৱ গান্ধী চৰকাৰে সংসদত SPG Act গৃহীত কৰি প্ৰক্ৰিয়াটোক আইনী মৰ্যাদা প্ৰদান কৰে ।

নতুনকৈ প্ৰণয়ন হোৱা আইনখনত কেৱল প্ৰধানমন্ত্ৰী, তেওঁৰ পত্নী/স্বামী আৰু সন্তানক  SPGয়ে নিৰাপত্তা প্ৰদান কৰাৰ ব্যৱস্থা কৰা হয় ।

সেয়ে প্ৰধানমন্ত্ৰীৰ কাৰ্যকাল শেষ কৰাৰ পিছত ৰাজীৱ গান্ধীক SPG সুৰক্ষা দিয়া নাছিল । কিন্তু ১৯৯১ চনত গান্ধীৰ হত্যাৰ পিছত আইন সংশোধন কৰি প্রাক্তন প্ৰধানমন্ত্ৰীক পদ এৰাৰ ১০ বছৰলৈকে SPG সুৰক্ষা দিয়াৰ ব্যৱস্থা কৰা হ’ল । ১০ বছৰৰ অন্তত পৰ্যালোচনা কৰি সুৰক্ষা বৰ্জন নতুবা পুনৰ প্রদান কৰাৰ নিয়ম ৰখা হ’ল । সেই মৰ্মে পৰ্যায়ক্ৰমে পৰ্যালোচনা কৰি ৰাজীৱ গান্ধীৰ পত্নী ছোনিয়া গান্ধী, সন্তান ৰাহুল গান্ধী আৰু প্রিয়ংকা গান্ধীয়ে ২০১৯লৈকে ২৮ বছৰৰ SPGৰ সুৰক্ষা লাভ কৰে ।