কাজিৰঙাত বিলুপ্তপ্ৰায় দল হৰিণৰ গণনা আৰম্ভ, ছয়োটা সংযোজনতে আৰম্ভ গণনা

 

বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যান (Kaziranga National Park)ত আজিৰ পৰা অনুষ্ঠিত হৈছে বিৰল প্ৰজাতি দল হৰিণ (Swamp Deer Census)ৰ গণনা ৷ দল হৰিণ ভাৰতত পোৱা বাৰাশিঙা নামৰ হৰিণৰ উপ প্ৰজাতি৷ ব্ৰহ্মপুত্ৰ উপত্যকাত পোৱা বাৰাশিঙা হৰিণৰ উপ প্ৰজাতিক পুৰ্বাঞ্চলীয় দল হৰিণ বা ইংৰাজীত Eastern Swamp Deer বুলি কোৱা হয় ৷ পৃথিৱীৰ ভিতৰত অকল ব্ৰহ্মপুত্ৰ উপত্যকাতহে পুৰ্বাঞ্চলীয় দল হৰিণ দেখিবলৈ পোৱা যায় ৷

বিলুপ্ত প্ৰায় এই দল হৰিণ এটা সময়ত ব্ৰহ্মপুত্ৰ উপত্যকাৰ বিভিন্ন স্থানত দেখিবলৈ পোৱা গৈছিল যদিও সম্প্ৰতি কাজিৰঙা আৰু মানাহ ৰাষ্ট্ৰীয় উদ্যানতহে এই হৰিণৰ অৱশিষ্ট বাছি আছেগৈ ৷ কাজিৰঙা ৰাষ্ট্ৰীয় উদ্যানৰ দল হৰিণ বসতিৰ দুটা বন সংমণ্ডল ক্ৰমে পূব অসম বন্যপ্ৰাণী সংমণ্ডল আৰু বিশ্বনাথ বন সংমণ্ডলত পূৰ্বাঞ্চলীয় দল হৰিণৰ গণনা কৰা হ’ব ৷

বিশ্বনাথ বন সংমণ্ডলত দল হৰিণৰ গণনা কৰিছে ৷ গণনাকাৰীৰ ভিতৰত বন্যপ্ৰাণী বিশেষজ্ঞ, বেচৰকাৰী সংগঠনৰ প্ৰতিনিধি আৰু বন বিষয়া থাকিব ৷ পূৱ অসম বন্যপ্ৰাণী সংমণ্ডলৰ কাজিৰঙা ৰাষ্ট্ৰীয় উদ্যানখনৰ ৫টা বনাঞ্চলৰ ৪টা বনাঞ্চলত ২৪ গণনাকাৰীয়ে বিভাগীয় হাতীত উঠি গণনাকাৰীয়ে দল হৰিণৰ গণনা কৰিছে ৷ ইয়াৰ বাবে ৰাষ্ট্ৰীয় উদ্যান খনত আজি পৰ্যটকৰ বাবে হাতী চাফাৰী বন্ধ আছে ৷

পুৱা ৮ বজাৰ পৰা বনাঞ্চলত হাতীত উঠি দল হৰিণৰ গণনা আৰম্ভ হৈছে ৷ কাজিৰঙাৰ সঞ্চালক পি শিৱকুমাৰৰ নেতৃত্বত এটা উচ্চস্তৰীয় দলে এই গণনা কাৰ্য পৰ্যবেক্ষণ কৰিব ৷

উল্লেখ্য যে ২০০৭ চনৰ পৰা কাজিৰঙাত আৰম্ভ কৰা দল হৰিণ গণনাত ২০১৬ চনত কাজিৰঙা ৰাষ্ট্ৰীয় উদ্যানত ১১৪৮টা আৰু ২০১৮ চনত ৮৫১টা দল হৰিণ পোৱা গৈছিল ৷ একেদৰে বিশ্বনাথ বনসংমণ্ডলত প্ৰথম বাৰৰ বাবে কৰা গণনাত ২০১৮ চনত ৫৬টা দল হৰিণ পোৱা গৈছিল ৷ প্ৰতি দুবছৰৰ মূৰে মূৰে দল হৰিণৰ গণনা হয় যদিও ২০২০ চনত ক'ভিডৰ বাবে গণনা অনুস্থিত নহ'ল ৷